انا خالد النجار
بعشق الخشب والنجاره ، بشتغل على أفكار وابتكارات لاستغلال المساحات ، بساعد كل اللى نفسه يعمل فى بيته مكان او كورنر خاص بيه ومش عارف يعمل فيه ايه وازاى
بساعد أى حد بيجدد أو بيشطب شقه جديده أنه يعملها زى ما هو بيتمنى
علشان يكون بيتك المكان اللى تحب تعيش فيه ، وتستريح فيه ، وتقدر تفصل فيه بعد عناء يوم طويل
" الشغف "
انا مهندس ميكانيكا بقالى 15 سنه . والحمد لله من يوم ما اتخرجت وانا شغال فى مجال البترول ، نفس السنه اللى اتخرجت فيها اشتغلت فيها ، وبعدها بسنه دخلت فى فيلم الجواز ومصاريفه والاولاد ومصاريفهم ، كل كده ورا بعضه حاجه كده طاحونه
العجيب ان الناس كلها عارفه انها طاحونه ومحدش فرمل خالص .. كله مكمل .... الطاحونه دى مخلتنيش اقف شويه بحزم وجديه واسأل نفسى .. هل ده الطريق اللى بحبه وأحب اكمل فيه ... هل ده الطريق المناسب لاهتماماتى وشغفى .. أصلا فى الدوامه دى كلمة " شغف" دى رفاهيه .. " فضلة " الوقت ان كان فى وقت ... مستلزمات الحياه كامله بتخليك تفكر بس فى الفلوس اللى انت محتاج توفرها علشان تعيش عيشه كريمه انت وأهلك .. أتارينى بعييش فى وادى وفى حته جوايا فى وادى تانى كل يوم بدفنها أكتر ، وأقولها مش وقتك ، بعدين ، لما أفضى .
ومن فتره كده قررت أنى اسمع لنفسى ومسكتهاش .. لقيتها بتقولى " لحد امتى ؟ ، أنت مش لاقي نفسك خلاص فى الشغل والدوامه دى ، أنت مش قادر تضيف فيه أى حاجه جديده ، خلاص مفيش انجازات ولا اضافات ولا ابداعات ... خلاص الروتين الطبيعى بيموتك ... بتعد الساعات علشان تمشى من الشغل وترجع بيتك ... انت ليه دافن نفسك كده ؟ ليه ؟
ساعتها بس قولت لنفسى ليه ؟ فعلا ليه ؟ ايه اللى مخلينى كده .. انا ساكت ليه ؟ لازم فى حل ...وفضل الامر معايا متعلق ، بس انا المره دى غير قبل كده .. المره دى انا دايما بفكر ، دايما بسأل نفسى السؤال ده " انت عايز ايه ، بتحب ايه ، نفسك تخلص من الدوامه دى بإيه ؟ " وفجأه افتكرت زمان .. اه زمان أوى
أيام شادر الخشب
لما فتحت عينى على الدنيا لقيت عائلتى تجار اخشاب كبار ، والدى واعمامى وجدى .. كلهم تجار للخشب ، كنت ساعات امسك قطعة الخشب كده واحسس عليها واشمها وساعتها كنت بحس انى نفسى اقدر اعمل بيها حاجه بس مكنتش عارف ازاى ..
ولما كانت عائلتى تجيب نجار علشان يعملها شغل ، كنت افضل قاعد معاه واراقبه واشوف بيعمل الحاجه ازاى وكنت ببقى نفسى اشتغل معاه بس كان دايما معندوش وقت
.
وان اول مره اشتغل لما جيبت منشار اركت وبدأت اشترى من مكتبه جنب المدرسه رسومات لحاجات زى مقلمه او شماعات أو رسومات كرتون .. وقد ايه كنت مبسووووط اوى باللى بعمله
.
وافتكرت انى لما خطبت وكنت عايز ادى لخطيبتى هديه بجد ، حاجه تعبر عنى وعن اللى جوايا ، فعملتها بالخشب ، وفعلا عملتلها حاجه كانت تحفه الصراحه .. اد ايه كنت مستمتع وانا بعملها بأيدي ،وانبسط اكتر لما عجبتها اوى ووافقت تتجوزنى والحمد لله
.. :).
عرفت ساعتها انى بحب الخشب وشغله وبلاقى نفسى وبنسى الدنيا وانا شغال فيه .أول حاجه عملتها
سنة 2010
قررت انى اصحى الشغف ده بقوه شويه جنب شغلى ... قررت انى ابدأ امارسه فى اوقات فراغي .. وقررت انى اعمل bench اشتغل عليه ، وانا اساسا معرفش ازاى احسب مقاساته أو اجمعه ، انا خبرتى هنا صفر .
وروحت ورشه نجاره وقلت للراجل " عايز اعمل بينش اشتغل عليه " قالى " يعنى عايز خشب ايه " قلت له " فى الحقيقه معرفش لكن دى الرسمه بتاعته " وكانت رسمه معموله بخط الإيد ثلاثية الأبعاد عليها أبعاد كامله زى الطول فى العرض والارتفاع وتخانة الخشب المستخدم و صنعت أول bench ليا .. وكان بدائى جدا لابسط الحدود لكن كنت مبسوط بنفسى جدا جدا . وحسيت انى أقدر وان فى أمل غير عادى فيا...
وفضلت على الحال ده شويه كل أجازه اعمل حاجه ، واشتريت كام كتاب كده من امريكا فى شغل الخشب وكنت كل شويه اشترى حاجه من العده واضيف للورشه.
. قررت بعد كده أعمل تانده كبيره أوى تظلل عليا وانا شغال ، لان الشمس كانت شديده أوى .. وفعلا رسمتها واشتريت الخشب وقطعته وجمعته وهوب حطيت القماش وعملت حاجه انا شوفتها ساعتها إنها معجزه بالنسبه لى وعلى إمكانياتى ومهاراتى دى ، وكان اى حد يشوفها ميصدقش إنى أنا اللى عملتها .. كانت كبيره حوالى 3 م فى 4 م متعلقه فى الهوا كده ، فكانت حاجه تحفه الصراحه ... وحتى الان موجوده ومحافظه على قوامها لكن القماش بس اللى اتقطع وداب من الشمسغير ان اى احتياج للبيت كنت بعمله من رفوف ، لباب سلك أو باب مطبخ صغير ، أو تصليح لعب الاولاد الخشبيه وهكذا.. مرت كام سنه وانقطعت فترات طويله أوى ويعتبر مفيش تقدم حقيقى عن البدايه
...
لكن فى سنة 2016 قررت العوده وانى ابدأ امارس شغفى د اكتر شويه واظبط حالى أكتر من كده .. فبنيت الورشه بتاعتى وقررت انى أحاول أأسسها على قد ما أقدر ... فضلت حوالى سنه وشويه كل أجازه اعمل حاجه جوه الورشه تساعدنى إنى اعرف اشتغل بسهوله بعد كده
واخيرا قررت انى اعمل أول عمل حقيقى وكان مكتبه للاطفال جوه البيت بحل بيها مشكلة الالعاب الكتيره اللى ملهاش مكان ، وفعلا رسمتها الاول واشتريت الخشب وقطعته وجمعته وجبت واحد يدهنه عندى علشان أتعلم منه ،الراجل لما شاف المكتبه مكنش مصدقنى لما بقوله إنها مجرد هوايه .. كل ده فى ورشتى المتواضعه..والحمد لله كانت كويسه جدا . ومنها أخذت ثقه كبيره فى نفسى وامكانياتى وساعتها عرفت انى لو اهتميت أكتر وأشتغلت أكتر حقدر أعمل حاجه أحسن فعلا بإذن الله
. وهنا حصلت نقطة تحول حقيقيه فى المسار بعد ما عرفت الpassion to profit system.
محاضرة علم النفس :
كنت قاعد مع زوجتى مره بنحضر احدى محاضرات علم النفس ولما جه وقت ال break لاقيتها بتقولى شوف اللى انا بعتاهولك ، فتحت فلقيت صفحة واحد اسمه محمد تهامى بيتكلم عن الشغف وازاى ممكن يتحول لمشروع يجيب دخل وهكذا
.. وفى الحقيقه لم ألقى له بالاً لأنى كنت لا أثق بسهوله فى الناس اللى بتتكلم عن الاحلام والطموحات والمارد اللى جواك والطاقه والكلام اللى اصبح أغلبه دلوقتى تجاره وضحك على الناس ، وان الناس اللى بيتكلموا فيه صح وعن علم بقوا قلائل جدا
المهم وكعادتى أجلت الموضوع لما افضى شويه والغزاله تروق كده ... وكنت كل شويه اتكلم مع مراتى انى نفسى أسيب شغلى واعمل أى مشروع يوفر لى انى اشتغل الحاجة الل بحبها و اكون مستمتع وانا بعملها ، وكانت فى كل مره تقولى طب شوف تهامى بيقول ايه ..
-فى يوم من الايام قررت إنى افتح واشوف مين تهامى وبيتكلم عن ايه ... وقرأت قصته وشوفتله مقاطع على اليوتيوب وشدنى الموضوع وحسيته مختلف عن كل اللى فات وعنده فعلا فكره ونظام معين .... فقررت أأخذ الكورس أون لاين.بووووووووم
طاقه من الامل انفجرت .... قنبله من الاحلام وفرقعت ... دا انا فى زيى كتير ، وفى ناس عايشه نفس العيشه ، يعنى مش انا لوحدى اللى بعانى . لأ وكمان فى ناس قدرت تغير مسار حياتها وتاخد القرار الجرئ وتقف وتقول كفايه ... وفضلت اسمع قصص الناس اللى قدرت ونجحت وانا ساعتها لقيت دموعى نزلت من التأثر ... نفسى أكون أنا اللى زى الناس دى .. نفسى أعيش بشغفى وبس
YouTube أنا دايما بتابع قناة واحد قوى جدا على ال
اسمه مارك ، نجار محترف ، حاجه كده بالنسبه ليا سوبر واو .. وطبعا الناس اللى بتابعه على مستوى العالم بالالاف .. المهم فيوم بقرأ قصته وبدايته كانت ازاى وكانت مفاجئه مذهله ان مارك ده اتعلم النجاره والخشب على كبر ، وانه كان محتار يسيب شغله المحترم فى الجامعه ويكمل فى الخشب ولا لأ واختار طبعا شغفه .. وكمل فى الخشب ..
فضلت مبلم قدام القصه دى كتير اوى ، يعنى حتى مارك اللى بالنسبالى حاجه فوق السوبر بشويه طلع زى حالاتى ، بدأ من الصفر على كبير وكمان ساب شغله وكمل فى حلمه .. ياااه يعنى انا كمان ممكن اقدر ابقى كده ، يعنى انا كمان فى أمل انى انجح ..الانطلاقه
بدأت اطبق بقى اللى اتعلمته ، فعملت صفحة الفيس بوك ، وعملت فيديوهات عن شغلى ، واشتريت كتب ، واخدت كورسات فى الرسم والدهانات ، ولسه شغال فى كورسات تصميم وديكوروكل مدى بلاقى الطريق بيترسم اكتر واكتر كأنه لوحه مرسومه خطوطها باهته وكل ما اشتغل واسعى واحده واحده فى شغفى الخطوط تتقل واشوف اللوحه اكتر واكتر . واكتشف قد ايه هى لوحه جميله
ومع كل خطوه للامام بتكتشف نفسك اكتر واكتر ، فاكتشفت انى بحب جدا والحمد لله بقينا فريق متميز وبيطلع شغل والحمد لله
ربنا وفقه واتعرف على أحمد الجندى ، شغال فى التشطيبات بقاله سنين ، شاطر وامين واخلاقه عاليه جدا وشرحله اللى هو عايزه وبيحلم بيه فتفهم جدا وفرح أوى بالفكر ده ومن يومها اصبحوا شركاء فى شغل التشطيبات وعملوا شغل مع بعض كويس جدا والعملاء بيبقوا فعلا مبسوطين بعد ما الشغل بيخلص حلو ..
دلوقتى وبعد شغل كتير بفضل الله - بقى معانا فريق عمل محترف بمعنى الكلمه واحلى ما فى الموضوع اننا فى تناغم واحترام شديد بيخلى الشغل يظهر فى ابهى صوره .
الحلم
بحلم أنى ساعد الناس أنى أعملهم حاجات تخليهم يقدروا ينظموا ويرتبوا أو يحلو مشاكل بيوتهم بحلول ذكيه وغير تقليديه
